SERIKALI YAKATAZA MATUMIZI YA DOLA (IMTU)

Baadhi ya wanachuo wakiandamana kupinga matumizi ya dola kwenye malipo yao chuoni hapo

Habari na wadau wa elimu

SERIKALI imeuagiza  Uongozi wa Chuo Kikuu cha Sayansi na Tiba (IMTU) kuacha kutoza ada kwa fedha za kigeni na badala yake itoze kwa shilingi ya Tanzania.

Hatua hiyo ya Serikali imekuja kipindi ambacho kumekuwa na malalamiko kutoka kona mbalimbali za nchi kuhusu matumizi holela ya dola badala ya shilingi katika biashara na manunuzi.

Jana, Katibu Mkuu wa Wizara ya Elimu na Mafunzo ya Ufundi, Profesa Hamisi Dihenga alitangaza hatua ya Serikali kuzuia matumizi  hayo katika chuo cha IMTU akisema ada za chuo hicho zimekuwa juu ikilinganishwa na ada za vyuo vingine nchini.
Kwa muda mrefu wanafunzi wa IMTU wamekuwa wakilalamika na kuingia kwenye mgomo wakipinga kutozwa ada kwa kutumia viwango vya dola badala ya shilingi

Profesa Dihenga alisema kushuka kwa thamani ya shilingi mwaka hadi mwaka kumesababisha ada kupanda mara kwa mara.Kwa mujibu wa Profesa Dihenga ada ya mwaka 1996 ilikuwa Dola 4,500 za Marekani  sawa na Sh2.7 milioni wakati kwa kiasi hicho mwaka 2011, ada ni Sh7.2 milioni.

“Hivyo wizara imeamua malipo yote yafanywe kwa shilingi ya Tanzania na TCU ifuatilie kwa uangalifu utekelezwaji wa mwongozo wake,” alisema Profesa Dihenga.

Alisema mwongozo wa TCU unahimiza vyuo vyote kutoza ada kwa kutumia shilingi ya Tanzania kwa wanafunzi Watanzania.Aidha chuo hicho kimetakiwa kufuata kanuni za udahili wanafunzi na hasa uwiano kwa wanafunzi wa ndani na wa nje ya nchi (25:75) kama ilivyo katika hati idhini za chuo hicho.

Mgogoro huo  uliodumu kwa takribani miezi mitatu ulikuwa unahusisha uongozi wa chuo hicho na wanafunzi  na kusababisha kufungwa kwa chuo hicho Agosti 23, mwaka huu na ulisababishwa na utaratibu uliokuwa ukitumiwa na chuo hicho wa kulipa ada kwa Dola za Marekani.

Katika hatua nyingine, wizara imeitaka TCU kufanya ukaguzi wa kitaaluma na kiutawala kwenye chuo hicho ili kubaini ukweli wa malalamiko ya wanafunzi wa kutoridhishwa na mfumo wa uendeshaji na utoaji wa taaluma chuoni hapo ili kuweza kuchukua hatua kwa mujibu wa sheria na kanuni zilizopo